WhatsApp gizlilik yönümlü ən böyük yeniliklərindən birini elan edib. İstifadəçilərin səbirsizliklə gözlədiyi WhatsApp istifadəçi adları funksiyası 2026-cı ildə istifadəyə veriləcək. Bu yeni sistem sayəsində insanlar telefon nömrələrini paylaşmadan ünsiyyət qura biləcəklər.
 

Yeni sistem necə işləyəcək?
 

WhatsApp bu mühüm yeniliyi ilk olaraq biznes tərəfdaşları ilə bölüşüb. Yeni funksiya həm adi istifadəçilər, həm də biznes hesabları üçün ixtiyari (opsional) gizlilik seçimi kimi təqdim olunacaq. İstifadəçilər unikal istifadəçi adı təyin edərək telefon nömrələrini gizli saxlaya biləcəklər. Bununla da yeni insanlarla və ya şirkətlərlə yazışarkən gizlilik səviyyəsi əhəmiyyətli dərəcədə artacaq.
 

Bizneslər üçün son tarix: 2026-cı ilin iyunu
 

Bu keçid prosesi xüsusilə API üzərindən fəaliyyət göstərən bizneslər üçün çox vacibdir. WhatsApp şirkətlərə sistemlərini yeni dövrə uyğunlaşdırmaq üçün 2026-cı ilin iyun ayına qədər vaxt verib. Həmin tarixə qədər bütün biznes hesabları istifadəçi adlarını və “Business-Scoped User ID” (BSUID) adlanan yeni identifikatoru dəstəkləməlidirlər. Bu yeni identifikasiya sistemi bizneslərin müştərilərlə telefon nömrəsi paylaşmadan da təhlükəsiz əlaqə yaratmasına imkan verəcək.
 

Gizlilik üçün infrastruktur yenilənib
 

Şirkət bu dəyişiklikləri “gizlilik öncəli modernizasiya” adlandırır. İstifadəçi adı sisteminin tətbiqi uçdan-uca şifrələməni qoruyaraq tətbiqin infrastrukturunda əhəmiyyətli yeniliklər tələb edib. Bu funksiyanın 2026-cı ilin ilk yarısında mərhələli şəkildə bütün istifadəçilərə təqdim olunacağı, eləcə də istifadəçi adı rezervasiyasının həmin dövrdə başlayacağı gözlənilir.