Dünyanın ən böyük onlayn ensiklopediyası olan Vikipediya ilə bağlı diqqətçəkən hadisə baş verib. Platformanın həmtəsisçilərindən biri hesab edilən Larri Sanger Vikipediyada redaktə etmək hüququndan qeyri-müəyyən müddətə məhrum edildiyini açıqlayıb.

Sanger bildirib ki, bloklanma qərarı ona əvvəlcədən izah edilməyib və proses zamanı hər hansı rəsmi müdafiə və ya apellyasiya imkanı təqdim olunmayıb. Onun sözlərinə görə, qərar platformanın könüllü redaktorları tərəfindən qəbul edilib.

Məlumata görə, hadisədən əvvəl Larri Sanger Vikipediyada fikir müxtəlifliyinin və ideoloji balansın gücləndirilməsini təşviq edən təşəbbüslə çıxış etmişdi. O, ensiklopediyanın ilkin prinsiplərinə – neytrallıq, şəffaflıq və müxtəlif baxışların təmsil olunmasına daha çox diqqət ayrılmasının vacibliyini vurğulayırdı.

Qərardan sonra Vikipediyanın digər həmtəsisçisi olan Jimmy Wales qısa müddət ərzində məsələyə müdaxilə etsə də, Sanger sonradan yenidən qeyri-müəyyən müddətə bloklanıb.

Qeyd edək ki, Larri Sanger 2001-ci ildə Vikipediyanın yaradılmasında iştirak edib və layihənin ilk qaydalarının formalaşdırılmasında mühüm rol oynayıb. Son illərdə isə o, platformada ideoloji qərəzliliklə bağlı müxtəlif tənqidlər səsləndirib.

Hadisə sosial şəbəkələrdə geniş müzakirələrə səbəb olub. Bir qrup istifadəçi qərarı dəstəkləsə də, digərləri Vikipediyanın həmtəsisçisinin belə bir formada bloklanmasını söz və fikir plüralizmi baxımından mübahisəli addım kimi qiymətləndirirlər.