Cəmi 17,5 saat ərzində dünyanın müxtəlif kosmodromlarından orbitə altı raket buraxılışı həyata keçirilib. Bu göstərici bir sutka ərzində həyata keçirilmiş raket buraxılışlarının əvvəlki maksimum sayını iki dəfə üstələyib.

TED.az xarici mediaya istinadla xəbər verir ki, missiyaların əksəriyyəti peyk internet şəbəkələrinin yerləşdirilməsi ilə bağlı olub. Görünür, kosmik trafikin bu qədər sıxlığı hələ başlanğıcdır.

Belə ki, aprelin 29-da (Bakı vaxtı ilə saat 01:10-də) Çin Haynan adasında yerləşən Vençan kosmodromundan “Long March 5B” raketini orbitə buraxıb. Raket “Guowang” adlı genişzolaqlı əlaqə üçün nəzərdə tutulmuş böyük peyk şəbəkəsinin yaradılması məqsədilə bir qrup peyki Yerin aşağı orbitinə çıxarıb.

32 dəqiqə sonra Kaliforniyadakı Vandenberq Kosmik Qüvvələr bazasından “SpaceX” şirkətinin “Falcon 9” raketi buraxılıb. Raket Yerin aşağı orbitinə 27 ədəd “Starlink” internet peykini çatdırıb.

Daha sonra, Şərq vaxtı ilə saat 19:01-də (Bakı vaxtı ilə aprelin 29-u saat 04:01-də) “United Launch Alliance” şirkətinin “Atlas V” raket-daşıyıcısı Floridada Kosmik Qüvvələr bazasından buraxılıb və “Amazon” şirkətinin “Project Kuiper” genişzolaqlı rabitə meqabürc şəbəkəsi üçün ilk 27 peyki orbitə çıxarıb. 3,5 saat sonra NASA-nın Kennedi Kosmik Mərkəzindən daha bir “Falcon 9” raketi buraxılıb və orbitə 23 “Starlink” peyki çatdırılıb.

Aprelin 30-u səhər saatlarında daha iki buraxılış həyata keçirilib, lakin bu buraxılışlarda internet peykləri orbitə çıxarılmayıb.

Şərq vaxtı ilə saat 05:15-də (Bakı vaxtı ilə 14:15-də) Fransız Qvianasındakı Kuru kosmodromundan “Arianespace” şirkətinin “Vega-C” raketi buraxılıb. Raket Avropa Kosmik Agentliyinin “Biomass” peykini Yer aşağı orbitinə çıxarıb. Bu cihaz meşələrin vəziyyətinə nəzarət edəcək. “Vega-C” üçün bu, cəmi dördüncü, 2022-ci ilin dekabrında baş vermiş uğursuz uçuşdan sonra isə ikinci buraxılış olub.

Həmin gün səhər “Firefly Aerospace” şirkəti Vandenberq kosmodromundan “Alpha” raketinin altıncı buraxılışını həyata keçirib. Raket “Lockheed Martin”in texnologiyalarını nümayiş etdirən peyki daşıyıb. Lakin birinci və ikinci pillələrin ayrılması zamanı nasazlıq baş verib və faydalı yük itib.

Nəticədə 17,5 saat ərzində orbitə altı raket buraxılışı həyata keçirilib, onların beşi uğurlu olub. Bu, son dərəcə yüksək aktivlikdir və görünür, bu yalnız başlanğıcdır.

“SpaceX” artıq həftədə bir neçə buraxılış həyata keçirir, böyük peyk genişzolaqlı rabitə şəbəkələrinin hazırlanması isə davam edir. Buna görə də raket buraxılışlarının daha da tez-tez baş verəcəyi gözlənilir.