Yaradıcı Mərkəz, Türk Animasiya Assosiasiyası və Özbəkistan Yaradıcı Assosiasiyası animasiya və oyun sənayesinin inkişafına dair əməkdaşlıq memorandumu imzalayıb

13.12.2025 18:31

Mədəni və Yaradıcı Sənayelərin İnkişafı Mərkəzi (Yaradıcı Mərkəz), ATA – Türk Animasiya Assosiasiyası və UzCA – Özbəkistan Yaradıcı Assosiasiyası animasiya və oyun sənayesinin inkişafına dair üçtərəfli əməkdaşlıq memorandumu imzalayıb.

Tərəflər arasında imzalanan Anlaşma Memorandumu Azərbaycan və Özbəkistan yaradıcı sektorlarının inkişafı üçün mühüm strateji addım hesab olunur.

Memorandumun məqsədi animasiya və oyun sənayesi sahələrində yeni imkanlar yaratmaq, mütəxəssis hazırlığına dəstək vermək, birgə layihələrin icrası və regionda yaradıcı sənayelərin davamlı inkişafını təşviq etməkdir.

Saziş çərçivəsində tərəflər birgə animasiya və oyun layihələrinin hazırlanması, təlim və mentorluq proqramlarının təşkili, gənc istedadların inkişafı, həmçinin regional və beynəlxalq səviyyədə yaradıcı əməkdaşlığın genişləndirilməsi istiqamətlərində fəaliyyət göstərəcəklər.

Bu əməkdaşlıq gənc istedadların inkişafına, animasiya və oyun sənayelərində yeni layihələrin ortaya çıxmasına və Azərbaycan–Özbəkistan yaradıcılıq münasibətlərinin genişlənməsinə mühüm töhfə verəcək.

Memorandum üç il müddətinə nəzərdə tutulur və tərəflərin qarşılıqlı razılığı ilə uzadıla bilər.

Bu tərəfdaşlıq regionun yaradıcı sənayələrində yeni ekosistemin formalaşmasına ciddi stimul verəcək.