Azərbaycan Dillər Universitetində (ADU) Strateji inkişaf və planlama şöbəsi və PR Point Baku şirkətinin birgə təşkilatçılığı ilə “Sevil Art” brendinin yaradıcısı, dizayner Sevil Əhmədova tərəfindən “Yaradıcılığımı biznesə necə çevirim?” mövzusunda təlim keçirilib.

Təlim zamanı Sevil Əhmədova şəxsi yaradıcılıq yolundan, “Sevil Art” brendinin yaranma və inkişaf mərhələlərindən ətraflı danışıb. O, yaradıcılığın biznesə çevrilməsi prosesində qarşılaşdığı çətinliklər, qlobal bazarda tanınmaq üçün atdığı addımlar, beynəlxalq sərgilərdə iştirakın əhəmiyyəti və məhsulların xarici bazarlara çıxarılması strategiyaları ilə bağlı təcrübəsini tələbələrlə bölüşüb.

Eyni zamanda, Azərbaycan brendinin beynəlxalq arenada tanıdılması istiqamətində konkret və praktiki nümunələr təqdim olunub. Təlim çərçivəsində kreativ ideyanın uğurlu biznes modelinə çevrilməsi üçün ardıcıl strategiyanın qurulması, rəqəmsal platformaların rolu və hədəf auditoriyasının düzgün müəyyənləşdirilməsinin vacibliyi xüsusi vurğulanıb.

Sonda iştirakçılar yaradıcılığın biznesdə tətbiqi, satış və təqdimat strategiyaları, eləcə də kreativ brend hekayəsinin qurulması ilə bağlı suallar ünvanlayaraq mövzu ətrafında faydalı müzakirələr aparıblar.