20 oktyabr 2025-ci il tarixində TEXIO Academy tərəfindən Qarabağ Universitetinin müəllim və tələbə heyəti üçün kibertəhlükəsizlik və rəqəmsal savadlılıq mövzusunda maarifləndirici təlim təşkil edilib.

Təlimi TEXIO Academy-nin təsisçisi və direktoru, kibertəhlükəsizlik üzrə ekspert Elgün Bəxtiyaroğlu keçib. Sessiya zamanı iştirakçılara kibertəhlükəsizlik anlayışları, kiberhücum növləri, məlumatların qorunması və təhlükəsiz onlayn davranış qaydaları barədə praktiki məlumatlar təqdim olunub.

Təlimin əsas məqsədi-akademik mühitdə rəqəmsal təhlükəsizlik mədəniyyətini gücləndirmək, gənclərdə və müəllimlərdə kibergigiyena vərdişlərini formalaşdırmaq olub.

Sessiyanın sonunda interaktiv “Kahoot” viktorinası keçirilib. Kibermaarifləndirmə təlimində aktiv iştirak edən və suallara düzgün cavab verən qaliblər TEXIO Academy tərəfindən xüsusi hədiyyələrlə mükafatlandırılıblar.

TEXIO Academy bu kimi kibermaarifləndirici təşəbbüslərlə ölkədə rəqəmsal təhlükəsizlik mədəniyyətinin yayılmasına və gənclərin kibersahəyə marağının artırılmasına töhfə verməyə davam edir.